Plantun de Prouvènço

Pèr coumpara dos planto d'encò nostre

Leucanthemum cuneifolium & Pinguicula vulgaris

Leucanthemum cuneifolium

Asteraceae Compositae

Nom en français : Marguerite à feuilles en coin.

Descripcioun :
La margarido-di-fueio-en-cougnet trachis en mountagno dins lis Aup dóu miejour. Fai uno souleto flour coumpausado sus sa cambo que porto gaire de fueio. Se recounèis à si fueio en cougnet à la baso e di proun dentado (fotò), alor que li bratèio de la flour soun bourdado de negre. Pèr d'ùni farié partido de la meno L. adustum, pamens nous sèmblo bèn caraterisado dóu poun de vist mourfoulougi.

Usanço :
Emai aguèsson pas trop d'usanço, li margarido soun manjadisso : flour, jóuini fueio e racino. Soun peréu vertuouso : fan pissa e susa, soun bono contro lis espaime e ajudon à digeri.

Port : Grando erbo
Taio : 20 à 120 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Leucanthemum
Famiho : Asteraceae
Famiho classico : Compositae
Tribu : Anthemideae
Ordre : Asterales

Coulour de la flour : Blanco Jauno
Petalo : >6
Ø (o loungour) flour : 4 à 6 cm
Flourido : Printèms - Estiéu

Sòu : Ca
Autour basso e auto : 200 à 2200 m
Aparado : Noun
Jun à avoust

Liò : Prado - Pelouso
Estànci : Subremediterran à Mountagnard
Couroulougi : Ouroufito-Sud-Éuropenco
Ref. sc. : Leucanthemum cuneifolium Legrand ex H.J.Coste, 1903

Erbo-grasso

Pinguicula vulgaris

Lentibulariaceae

Noms en français : Grassette commune, Langue-d'oie.

Descripcioun :
L'erbo-grasso trachis en mountagno, sus cauquié, dins li riéusset e àutri relarg bagna. Es uno planto carnivoro que pòu aganta de bestiouno emé si fueio pegouso à bord envertouia. Se destrìo de si cousino, mens coumuno, que si flour soun plato emé uno taco blanco sus li petalo que li bord soun pas gaire net.

Usanço :
Li fueio soun couneigudo pèr caia lou la, parié qu'en Suèdo se n'en servien. S'adoubo un sirop purgatiéu que sèrt peréu pèr gari contro lis escarto de pèu. Aro s'atrobo en fitouterapìo pèr sougna lou tussi (espetouranto), li mau de garganto e apasima li nèrvi. S'adoubo en tisano, 20 g de fueio emé de mèu e de jus de limoun. Pamens la planto èi proutejido dins d'ùni relarg.